ස්වභාව ධර්මයේ මේ ශ්‍රී විභූතිය පිළිබඳ නිර්මාතෘවරයාට අභියෝග කරන්නකු මෙන් තමාට පිටු පා බටහිර දිසාවභිමුඛ ව සිටි නිස්සංක දෙස ඈ තත්පර ගණනක් බලා සිටියා ය. අනතුරුව වුන් සරස්වතී ගලින් ගලට පිය නගා ඔහු වෙත ගොස් පිටුපසින් ඔහුගේ දෙ උර මත සිය දෑත් තබා පිටට කම්මුල ඔබා ගත්තා ය.

"නිශා !"
නිස්සංක කතා නැති ව සෙල් රුවක් සේ එහෙම ම සිටියේ ය. හිමින් හිමින් - සෙනෙහසින් දෑත් පහළට අත් අද්දගෙන් විත් බඳ වටා ඉදිරියට යවා ඔහු වැලැඳ ගත් ඈ, 
"නිශා අර කිව්ව විදිහට මම ඔයාට ආදරෙයි නිශා. කොන්දේසි විරහිතව සදහට ම ආදරෙයි!" යනුවෙන් තෙපළා ය.
සරස්වතී මානවඩුගේ ඒ අව්‍යාජ වූ ද ළයාන්විත වූ ද කටහඬ, ඉමක් කොණක් නැති ගමනක යෙදී සිටි සැඳෑ සුළඟ සමඟ මුසු විය.

කරුණාසේන ජයලත් 1971 දී එවකට පැවති ත්‍රස්තවාදී කලබල සමයේ කැලණිය විශ්ව විද්‍යාලයේ සිරකරුවකු ලෙස රඳවා තැබිණි. එහි දී ඔහු සිත් හි  පිළිසිඳගත් සරස්වතී මානවඩු නමැති විශ්ව විද්‍යාල ශිෂ්‍යාවකගේ චරිතය වටා ගොඩ නැගී ඇති "සතීගේ කථාව" මෙවර පාඨක සහෘදයන් වෙත පිදෙනුයේ වසර 45කට පසුවය.