'පිළිකාවට පිළියමක් - ජීවිතයට නව මගක්' යන මැයෙන්, ගුණදාස යාපා මහතා විසින් පරිවර්තනය කරන ලද මෙම ග්‍රන්ථය, ඉතා වැදගත් පණිවුඩයක් අපට කියා දේ. කලක් පිළිකා රෝගියකුව සිට, දැනට සුවය ලබා සිටින විශේෂඥ වෛද්‍ය ඩේවිඩ් සර්වන් ශ්‍රීබර් මහතා විසින්, තම ජීවන අත්දැකීම් පාදක කොට, මෙහි මුල් කෘතිය රචනා කර ඇත. විද්‍යාත්මක සොයා ගැනීම් වලින් මතු වන නව දැනුමින් එම කෘතිය සන්නද්ධ කර ඇති අතර, විවිධ (පැරණි) වෛද්‍ය ක්‍රමවල දැනුම ද උකහා ගෙන එයට අනුබද්ධ කර ඇත. අපි සියලු දෙනා, පිළිකා වැළඳීමේ අවදානමින් පෙළෙන්නෝ වෙමු. එම නිසා මෙහි අන්තර්ගත දැනුම, පිළිකා වැළඳුනු රෝගීන්ට පමණක් නොව, පාසල් දරුවන් ඇතුළු සියල්ලන්ට ම ඉතා වැදගත් වනු ඇත. 
අවශ්‍යයෙන් ම සඳහන් කළ යුතු කරුණ නම්, මෙම දැනුම අපගේ ජීවිතවලට කෙළින් ම අනුගත කර ගත හැකි වීම සහ එමගින් පැහැදිලි ප්‍රතිඵල ලබා ගත හැකි වීමයි.